ديمًا لما امشى فى الشارع بحب اتأمل وشوش الناس وافكر فى حالهم واشوف ستات كتير قاعدين بولادهم فى الشارع عشان تكسب لقمة عيشها من غير ماتسرق او تبيع أخلاقها ويأثر فيا حالها يمكن لأنى عارفة قد ايه ست زى دى نفسها ترتاح وتقعد فى بيتها وتلاقى راجل يصرف عليها ويريحها من تعب لقمة العيش مع العيال ومع بواخة الناس اكيد محدش بيسيبها فى حالها
ديمًا قلبى يوجعنى بالذات لما تكون قعدة بطفل رضيع فى الشمس منها للسماء حتى ملهاش مكان آدمى تمارس فيه حرفتها ويصعب عليا طفلها فى الوقت الى بحاول ابعد كل اذى صغير لإبنى وكل وسائل الراحة
امبارح لما شفتها بتبكى بحرقة مع بياعة جمبها وقدامها خشبة العيش مصدر رزقها وعلى رجلها ابنها وقعدت افكر اكيد الست دى بتعانى وملهاش غير انها تقول يارب ودعيتلها ربنا يرحمها ويقويها ويرزقها ويريح قلبها وفضلت افكر معقول مفيش حل ان الناس تراعى بعضها ونخفف معاناة بعض؟
ايه الى وصلنا للحال ده حكومة فى عالم وشعب طالع عينه فى عالم تانى .. بتتمنى انك تخفف معاناة الناس لكن هتقدر تعمل ايه فى الآخر اللهم انك تروح تشترى منها وتحس انك دعمتها وتدعيلها بس .
ستات كتير بتشحت فى الشوارع وعلى رجلها طفل رضيع فى الغالب عشان ترقق قلبك وفى يوم لقيت نفس الطفل بيتناوب عليه اكتر من شحاته واتوجع قلبى وقلت يارب لو حكومتنا مش قادرة تمنع الشحاته المبالغ فيها دى هل من أمل تمنع المتاجرة بالأطفال ؟
ليه احنا غير آدميين كدا ايه ذنب الأطفال دى تخيل طفلك مكانه عشان تحس بالمعاناة لو انت شايف ان الأمر عادى !
وشفت بنتين شكلهم أطفال شوارع والبنت الكبيرة بتشد بمنتهى العنف من بنت عمرها 3 او 4 سنين عروسة لعبة مبهدلة والبنت الصغيرة فى عنيها نظرة لا توصف وفضلت افكر قد ايه لعبة مبهدلة زى دى تشكل العالم بأسرة لطفلة صغيرة وبتروح عن بنت كبيرة بردو لدرجة انها مهتمش باللبنت الصغيرة وشدتها منها كنت اتمنى لحظتها الاقى محل لعب جمبى واشترى للبنت عروسة لها اتمنيت اقابلهم تانى يمكن اقدر افرحها
ومن فترة بحاول افكر نفسى انى احط فى شنطتى ديمًا لعبة اديها لأى طفل من دول اقابلهم صدفة وافرحة جربت البلالين وعملت مفعول سحرى محتاجة بقا اعمل حاجة تدوم معاهم شوية منا مش بايدى امنع معانتهم دى فهحاول ع الأقل اعملهم حاجة مرة تبسطهم من حقهم يفرحو من حقهم حد يفاجئهم مرة زى ماحنا بنتمنى حد يفاجئنا
بنجيب لاولادنا لعب كتير وفى لعب مبيحبهوش او بيفقدو شغفهم بيها ليه نفضل نراكملهم اللعب ونزحم الدنيا ليه منحاولش نعلمهم من وهما صغيرن ان اللعبة الى هو مش محتاجها دى ممكن تسعد طفل تانى شهور كتير ونمى جواه من صغره التفكير بالغير !
وانت بتشترى حلويات لطفلك او شيكولاته لنفسك عشان تدلع نفسك حاول تشترى لو كيكة صغننه واديها لابن بواب فى طريقك او اى طفل محتاج هتسعده قوى وانت هتتبسط انك اسعدت غيرك
فكر بغيرك متفكرش طول الوقت انك تسعد نفسك ودايرتك المغلقة فقط حاول تخفف معاناة من حولك بحاجات بسيطة فكر ان مهما كانت معاناتك فى ناس ظروفهم اصعب منك بمراحل الناس دى كل الى محتاجينه من الى حواليهم ابتسامه تهون عليهم - طبطة معنوية
ازاى نتهنى واحنا فى مكان عالى وقافلين على نفسنا وفى ناس تحت نفسها تشبع نفسها تفرح نفسها تجيب لعبة صغيرة لطفلها واحنا الى المفروض جسد واحد ..
Tidak ada komentar:
Posting Komentar