قسم شعب مصر

حبنا لبلدنا وإحساسنا بكرامتنا مخلينا كلنا عايزين نعمل أى أى حاجة عشان ننهض بيها خلاص وش الكآبة الى كان مرسوم على وجوه المصريين اتمسح تماماً ، كله حاسس بالامل والتفاؤل طالما الطاغية مشى مفيش اسوء منه هيحصل لنا
خلاص انتهت مقولة مفيش فايدة ، يارب اشوف حكومة نضيفة افخر بيها واحبها زى مالأتراك بيحبوا حكومتهم كده وكنت بقول يابختهم :))

?انا فى حلم

انا مش مصدقة التطورات الى بتحصل بشكل سريع قوى فى مصرنا الحبية وفى وطنا العربى كمان
ده حلم ولا علم ياربى :))

التعديلات الوزارية برغم انها مش نهائية ،،تجميد نشاط رئيس أمن الدولة، حل وزارة الإعلام ، سجن العادلى وعز وجرانه و القوات المسلحة ومحاولاتها التواصل معانا بشتى الأشكال ،، اللقاءات الدورية الى بتعقدها مع الشباب والمفكرين وامبارح لقائهم فى العاشرة مساء قمة الرقى والتواضع والثقافة ناهيك عن السماحة والصدق الى بيشع فى وشوشهم
انا بجد متفائلة قوى ومقبلة على الحياة بشكل غير عادى ورغبة حماسية عالية ،، الشعور بالظلم ده والكبت كان قاتلنا كلنا ومعيشنا فى هم إلى الأمام يامصر عقبال باقى البلاد الى حاكمها ديكتاتوريين وعقبال ماتشرق شمس حرية لبيا :)

صفحة القوات المسلحة على الفيس بوك
لقائهم فى العاشرة مساءً

وانا كمان نفسى قوى يامصر

نفسى لما اوقف تاكس اركب وبعدين اقوله راحه فينمتحايلش عليهم نص ساعة لحد ماواحد يقفلى
نفسى اركب الميكروباص ميزودش عليا الأجرة وانا راجعة البيت واضطر اتنح قدامه عشان مزودهاش
نفسى الأقى خامات الملابس نضيفة وبأسعار معقولة والأقى عبايات حلوة ميتطلعش روحى عشان الاقى
نفسى الجمارك تتشال خالص عشان أسعار كل حاجة تبقا معقولة زى دول الخليج كده
نفسى أكل الخضار والفاكهة من غير مبيدات وبردو أسعارها تكون معقولة ومتتجنش
نفسى يكون فى وعى دينى صح مش استغفال عقول
نفسى اشوف الولاد رجالة كده مش مسقطين البناطيل ولابسين تيشيرتات بترتر
نفسى نستغل قدرات كل طيور مصر المهاجرة والى عايزة تهاجر
نفسى محدش ييشغل أغانى ولا قرآن بصوت عالى فى الميكروباص أو المول أو الشارع
نفسى الشباب يقدر يشترى شقة عشان يتجوز من غير مايحتاج قعد سنين يحوش فى سعرها
نفسى أسعار السلع تكون فى كل مكان واحدة مش يزودها عشان جمب مستشفى أو نادى أو ....
نفسى يكون فى وعى ثقافى لكل فئات الشعب وميبقاش مقتصر على لفط المثقفين لفئة محددة
نفسى ملاقيش طفل شوارع ولا راجل نايم فى الشارع
ونفسى ونفسى ونفسى ونفسى

الثورة منتهتش

الصورة من عند مريم :)

حد مصدق انا من ساعة ماشفت البيان بجد وحاسة انى قلبى هيقف وفضلت شوية كده مش مجمعة الحمدلله الحمدلله الحمدلله

انا فعلاً حاسة بالنصر شكراً يارب انك مبترضاش بالظلم ،يارب يسرلنا الخير

انا كنت متفائلة ومبسوطة انى كنت متفائلة واعتقد ان اكتر الناس المتفائلة هيا الى حاسة بالنصر :))
لأننا كنا بنكافح عشان ننشر التفائل والإيجابية فى كل المواقف الصغيرة قبل الكبيرة

ثورتنا هتكمل لما نحقق كل مطالبنا ونمشى ايد واحدة فى تعمير بلدنا وتقليل اختلافتنا عشان نتحد فى أهدافنا العالية لمصلحة البلد ، مش مهم مين بيتكلم فى التلفزيون ، مش مهم مين قعد مع الجيش ، الأهم انهم بيعرضوا مطالبنا وانها تتنفذ مش وقت غيرة ونفسنة
ولا وقته تشويه رموز باينة لمجرد اننا بنختلف معاها بدون أدنى اعتبار بإنهم فاهمين وان ده شغلهم فى جزء ما

ليه مننساش اختلافتنا دلوقتى ونحاول نستفيد من كل فرد بغض النظر عن أفكاره ومعتقداته ونستفيد من خبرته فى المجال الى يتقنه وبس؟
كمان مش عايزين ننسى دعم إخوانا العرب الى بيحاولوا يحررو بلادهم : الجزائر ، اليمن ، البحرين

ياريت كل واحد يبدأ بتعمير أسرته ، عمارته ، جيرانه وياريت يدعم أى فكرة صالحة بغض النظر عن مين الى عاملها البلد عايزة شغل كتيييييير قوى الله المستعان :)

خواطرى عن الثورة -2

شحتفة مبارك
منذ 25 يناير لحد اليوم 8-فبراير حن علينا الريس بخطابين بحالهم كتير خيره الصراحه قلقنا نومه المبكر ، فى الخطاب الأول طبطب علينا بإقالة الحكومة وجابلك كام واحد جديد وبعض الناس فضلت متمسكة بكرسى العرش وده لم يريحنا طبعاً زى ماكان سيادته متخيل
وضحك علينا أنه أمر الشرطة متستخدمش العنف مع المتظاهرين امال الناس ماتوا من ايه ياريس؟ والشرطة اختفت ازاى من غير ماتعرف ياريس؟

الخطاب التانى كان شحتفه على نفسية المصريين وقعد يقلك انا عايز اموت فى مصر ومش هترشح تانى وانا شايل المسئولية ومش ههرب واسيبها إلا اما اكمل الى عليا لنهاية ولايتى وكنت حضرتك عملت ايه قبل كدا عشان خايف متكملش جميلك؟ حالف لتموتنا وتحرق البلد قبل ماتمشى ؟
المهم مصريين كتير اتسهوكو وصعب عليهم وقال خلاص ياجماعة كفاية كده ده زى أبونا أبو ايه؟؟ ده موظف بالدولة يختى انتى وهيا وبيقبض مرتب ومحدش ضربه يمسك الحكم ، انا كنت فرحانة فيه انه انكسر كده اه انا شريرة نياهاها لكن ياجماعة دم الشهداء يروح هدر؟ مش هو راع ومسئول عن رعيته؟

للأسف تانى يوم من خطابه الإنترنت رجع وانقسم الجميع قسمين كفاية كده المتظاهرين يروحوا والقسم التانى لا مش كفاية لازم يتنحى ، وفى نفس يوم خطاب الريس رئيس الوزراء قال محدش هيقرب للمتظاهرين وعلى رقبتى ، لكن للأسف تانى يوم طلع بلطجية فى صورة متظاهرين مؤيدين للريس وهجموا على المعارضين وانسحب الجيش وسابهم يضربو فى بعض !

أولاً ازاى الجيش ينسحب وميحافظش على الناس ويفصل بينهم ؟ ايوة الجيش خان الشعب واكيد أخد أوامر انه يقف يتفرج على الدم !
الهجوم ده اسفر عنه أصابات لناس كتير وامتداد فى عدد الشهداء ! المسلمين بيقتلو بعض؟ مش دى فتنة يامبارك؟
لا وايه هاجمين عليهم بجمال وخيول؟؟ فى ايه ياناس؟؟ الناس حتى سموها معركة الجمل

بجد من أصعب الأيام الى مرت علينا كلنا ، طبعاً كل ده من أساليب النظام القذرة والى بتتقلب عليهم من غبائهم قولولى بقا ازاى انا استنى الريس يكمل ولايته وهو مش عارف يوفر الأمن للمصريين ، هيوفر أمن لمصر ازاى؟.

وجوده من اول يوم للثورة بقا صورى ملوش أى لزوم ولا كرامة

كانت ليلة دامية 2-2 -2011 ولكن فى عز ده كله كانت حاسة بالأمل وأن يمكن ربنا خلى ده حصل عشان الناس متنخش من خطاب مبارك والمتظاهرين نضفوا ميدان التحرير من البلطجية وبعدها اختفوا بالتدريج هما فين دلوقتى محدش سامعلهم حس قال نعم لمبارك قال!
الدكاترة المتطوعين نزلوا التحرير وعالجوا المصابين المعتصمين ومنهم من توفى لأن المعتصمين سلميين معهمش أسحله ولا مولتوف ولا قنابل مسيلة للدموع زى البلطيجة .

ودى الطريقة الى كان بيحمى بيها المتظاهرين أنفسهم :)

انا متأكده ان ربنا مش هيقبل بالظلم ولا بد من غمة الظلم دى انها تزول وان ربنا يعوضنا كلنا بمستقبل حلو لو فضلنا مصريين على حقوقنا ، انا بجد فخورة قوى بالمصريين الشرفاء ، فخورة بأهالى الشهداء الى نزلوا يتظاهرو ، ياترى ياشباب يامؤيدين لمبارك لو كان حد من أهلكم ، أخوكم ، مراتك ، زوجك ، أختك ، والدك ، والدتك من الى اتقتلوا كنت هتفضلوا مؤيدين،طبعاً صعب اننا نشوف الإنقسام ده بس الحق والباطل ديماً موجدين فى المجتمع زى ماموجدين جوه أنفسنا .
والناس بدأت تقول خلوا العيال بتوع التحرير يروحو بيوتهم عايزين نشوف حياتنا وقفتو الدنيا وكلام جهل م الآخر
العيال دول هما الى جابولك نائب عشان نمنع التوريث ، وهما الى أقالوا الحكومة ، وهما الى مانعو وزراء من السفر وتجميد أرصدتهم وهما دول بردو الى هيعيشوك بكرامة ديلفيرى
وبالمناسبة الحكومة هيا االى موقفة حال البلد ياريت تقرأ المقال ده
مازال فى شباب مختفى تم القبض عليه ومحدش من أهلهم يعرفوا حاجة عنهم من يوم جمعة الغضب وكان من ضمنهم وائل غنيم أدمن صفحة كلنا خالد سعيد الى عن طريقها كان إيفنت ثورة 25 يناير ،تم الإفراج عنه امبارح وكان لقائه مؤثر وهز الشباب امبارح فى العاشرة مساءً

ربنا يحميه ويفرحنا بخروج أخوانا المصريين المخطوفين

كمان من الإيجابيات انضمام فئات كتير مختلفة للمظاهرات ودى من الأشياء الى تدعوا للتفائل ، كمان الدعم الى بيعملهولنا العالم العربى والأجنبى مفرحنى قوى ومحسسنى ان علاقتنا بالناس الى حوالينا هتبقا أحلى وأحلى وكمان متأكده ان السياحة فى مصر هتزدهر الفترة المقبلة وميدان التحرير هيبقا مزار عالمى :)

بجد مصر بقا ليها روح جديدة من يومين خرجت حسيت ان وجوه المصريين مختلفة عن قبل كده الناس فى الميكروباص بتكلم بعضها كأننا أسرة واحدة وكله بيدعى ان ربنا ينصرنا ومن الأشياء المضحكة المبكية ان مريت قدام قسم مدينة نصر لقيت يفطة كبيرة قماش مكتوب عليها الشرطة فى خدمة الشعب :)
توك افتكرت ياخى
:D

خواطرى عن الثورة-1

ميدان التحرير -25 يناير

عندى حاجات كتيرة قوى عايزة اتكلم عنها وأفكار وآراء وأحاسيس أتمنى أقدر أوصفها كلها كنوع م التوثيق للحظات التاريخية الى مرينا بيها ومازلنا فيها لحد الآن ،اعتذر إذا كانت أفكارى غير مرتبة .

يوم 25 يناير زى العديد مع المصريين لم نتوقع حدوث ثورة زى تونس وقولنا أهى مظاهرة عادى خصوصاُ انها كانت بإيفنت على الفيس بوك وكنت مقتنعة ان الثورة لازم يكون فيها فئات مختلفة من المصريين ولكن المفاجأة حصلت والعدد سّمع وكنت فرحانة قوى إن كان عدد كبير من الناس الإيجابية اتحركت ولما شفت الصور مصدقتش طبعا حزنت من تحرش الشرطة بالمتظاهرين والضرب والكهرباء و ......،لكن ده طبيعى فى مصر وبنهاية اليوم فضلت ادعى ربنا ان الناس تصمد ومر يوم 26 و27 وزاد احتكاك الشرطة والامن المركزى بناء على أوامر الظباط وناس اعتقلت ولكن هذا لم يزيد إلا صمود المصريين وانضمام أعداد كبيرة لهم وبداية عمليات الإستشهاد فى السويس بسبب الإحتكاكات مع الشرطة واستخدامها الرصاص الحى طول هذه الأيام لم أكن أتحرك من أمام شاشة الكمبيوتر !حتى تم فصل الإنترنت يوم الخميس بليل وسط اندهاشنا التام برغم اننا كنا مهيئين بسبب حجب تويتر والفيس بوك من قبل لكن برامج البروكسى مكنتش حرمانا من حاجة ربنا يخليلنا
Hotspotshield

بلغت الذروة بيوم 28 جمعة الغضب واستهبال الشرطة واستخدام رصاص مطاطى وحى ناهيك عن استخدام القنابل المسيلة للدموع طول أيام التظاهر وفصل الخدمة عن الموبيلات "يخربيت عقولكم" كل ده عشان يفرقو المتظاهرين وبنهاية اليوم انسحبت الشرطة ونزل الجيش فى الشوارع وبدأت اعمال البلطجة وحظر التجول والناس ولا همها وفضلت فى التحرير والعدد كان كبير ويحيا الشعب !


جمعة الغضب

طبعاً أحداث كتيرة وكلنا مندهشين ومش مستوعبين ومبسوطين بأن الشعب عرف والعدد زاد وزاد وبدأت الدربكة والريس أحل الحكومة واختار نائب سمعته كويسة ولكن لوثه اختيار الرئيس له كما قال أحدهم .
الموبيلات اشتغلت تانى يوم وكلنا فضلنا نكلم كل أصحابنا وأهلنا عشان نطمن عليهم بسبب أعمال البلطجة ودى كانت أكبر عدد مكالمات عن طريق الموبيل منذ استخدام الإنترنت :D :D
حد كان يصدق ان كل ده يحصل؟ انا فعلاً كنت فى أسعد أيام حياتى لأن كنت واثقة إن الله لا يغير مابقوم حتى يغيروا مابأنفسهم ولأننا استعادنا كرمتنا قدام كل الى يسوى وميسواش وكان بيشتم فى المصريين والحكومة الى كانت بتستقفنا
ده سعادتى لا توصف ان أحمد عز غار فى داهية تاخده

طبعاً لم يعكر صفوى غير وجود بعض الأشكال الضالة من الحكومة القديمة بس ليهم يوم ان شاء الله كمان القنوات المحلية فقعتنى قوى تحس انهم فى كوكب تانى وبعدين المشكلة ان شكلهم كدابين قوى نفس افرح فى وزير الإعلام قريب

طبعاً كان صدمة ان الحكومة تسيب علينا البلطجية وتفتح السجون عشان تخوفنا لكن سبحان الله برغم إحساس الرعب الى كان مسيطر علينا كلنا بسبب البلطجية وأعمال النهب المقصودة قدرنا نعدى الازمة دى بفكرة اللجان الشعبية الى جمعت بين الجيران فى كل شوارع مصر وكل واحد ماسك شومة او سكينة او او وواقف يحمى بيته وأهله شكراً مبارك على توحيد شعب مصر من غير ماتقصد

طول الفترة دى كان فى ذهنى آية " ويمكرون ويمكر الله والله خير الماكرين "،كل مالريس والحكومة يحاولو يعملوا حاجة يخوفونا بيها يفشلو والموضوع يقلب عليهم من غير مايقصدوا ، وبرغم كل ده وبرغم كل اللحظات الصعبة الى مرينا بيها بسبب الشعور بعدم الأمان والشهداء المتظاهرين أو غير حاسة بتفائل ومبسوطة وفخورة قوى بالمصريين
وبدعى ربنا يقوينا وينصرنا ويصلح أمورنا البلد اتبهدلت طول ال30 سنة اكيد إصلاحها مش هيكون سهل ولا بسرعة

طول الفترة دى مكنتش بتحرك من قدام التلفزيون مفاجأت مفاجآت بجد مكنتش مصدقة الى بيحصل ومين كان يصدقك؟ الثورة دى غسلتنا كلنا وغسلت إحباطنا وشعورنا بالذل والظلم وقطع الإنترنت خلى الشعب يركز فى الثورة . برغم ان عدد المتظاهرين فى كل مصر اقل من عدد المصريين بس يمكن بإخلاص نواياهم الشديد غيرو كتير قوى قوى فى تعديلات بقالنا سنين بنهاتى فيها

اكمل خواطرى بعد مرحلة عودة الإنترنت فى البوست القادم إن شاء الله