مع تزايد شعبية الشبكات الإجتماعية وبمرور الوقت وتحويلها لشبكات لتبادل الإتهامات والتفسيرات والنظريات ظهر ناس كتير ماسكة ميكرفون الاستيتس وبتخاطب عامة الشعب الى هما "الفريندز " .
كل واحد بقا من فوق يقيم عامة الشعب ده صالح وده طالح ده ثورى وده خاين ده شجاع وده جبان ده سلبى وده ايجاى ده هيدخل الجنة وده هيدخل النار
كأن كل واحد أيقن بشكل تام ان هو الصح وان هو التمام وان هو المؤمن والباقى كفار وان الجنة فى جيبة والباقى هيدخل جهنم حدف !
مش بس كدا لا ده كمان تقمصنا محاكم التفتيش عن نوايا البنى آدمين عشان نطلعهم بالإنطباع الى احنا عايزينه حتى لو مفيش دليل مباشر وواضح نستدل بيه على رأينا !
كمثال بسيط نتكلم على بنات انهم عشان مش محجبات مش هيدخلو الجنة وانهم كذا وكذا
وكأننا معانا مفاتيح ربنا!
وكأننا ضمنا ان أعمالنا ربنا قبلها وكأننا ضمنا ان قلوبنا سليمة واننا زى الفل فعلًا
ليه كل واحد ميركزش على نفسه وعلى عيوبه ومشاكله ويبطل تقييم الناس وتحليلهم وتصنيفهم ،،، انت مش عارف ان لغتك الفوقية دى بتوصل رسايل للى حواليك انك شخص متعالى وملتف حول ذاتك وانك شايف ان انت الى زى الفل والباقى حثالة؟
على أى أساس تحط نفسك فى مرتبة أعلى من الى حواليك بتقييمك ليهم انت افترضت ان انت الى صح وان انت الى كامل !
هنستفيد ايه لما نصنف الناس؟ هنستفيد ايه لما نقولهم انهم وحشين وزبالة ؟ هل عمرك فكرت انت بتنقد الحاجة بغرض أصلاحها ولا لمجرد النقد ؟
هل عمرك فكرت الكلمة الى بتقوله عايز ترضى بيها مين ؟ ترضى نفسك ولا ترضى الناس ولا ترضى ربنا؟
لو فعلًا عايز تغير لازم تكون متواضع لازم تكون بسيط لازم تنزل لمرتبة الناس لازم تتعامل بلطف مع الناس عشان تساعدهم انهم يتحسنوا ،، كل واحد مبتلى بعيب ما مفيش حد خالى وكل واحد ممكن يكون فى مكان الشخص الى بيتريق عليه ..
نعم كتير فيك وعندك من ربنا مش منك سهل قوى ان ربنا ياخدها منك لو انت مفهمتش ده وتخيلت ان انت الى خليت نفسك كدا
Tidak ada komentar:
Posting Komentar