ميزانية البيت ياأمينة

مع بداية العام حددت هدف إنى أحاول أظبط ميزاينة البيت الفلوس الى بنصرفها على الأكل والشرب قبل كده كنا بنروح نشترى أكل الأسبوع وندفع من غير مانحدد المفروض نصرف كام بس بالوقت اكتشفت انه تقريباً مبلغ ثابت لكن لما حسبته شهرياً حسيت إنه كتير أو بمعنى أدق محتاج تنظيم لأن فى أى وقت بنحتاج حاجة بنجيبها وده مش صح دائماً .

فاقترحت على زوجى انه يدينى مبلغ محدد كل أول شهر بحيث أقدر ارتب احتياجات البيت على قد المبلغ ده بتقسيمه على 4 أسابيع ،
وجبت ورقة وقلم وكتبت الأكل الى هعمله طول الشهر وعلى أساسه كتبت الإحتياجات المطلوبة بأسعار تقريبية .
وكنت كل ماشوف أسبوع بينتهى بميزانية المحددة كنت بكون مبسوطة قوى وكنت واخدها تحدى ان لازم اقضى الشهر بالمبلغ ده .

وبالفعل حصل وفى نهاية الشهر كان باقى 50 ريال من الميزاينة الى كانت نصف الى بنصرفه كل شهر تقريباً،حسيت بسعادة غير عادية إنى نجحت فى تنظيم الأكلات والإحتياجات طول الشهر كمان وفر عليا سؤال كل يوم هطبخ ايه بكرة
وكمان مهم انك ترحلى بعض الاحتياجات لأسبوع تانى عشان متصرفيش فى اسبوع زيادة قوى وتيجى فى التانى تلاقى العملية مزنفة .

بجد أنصح كل ست بيت تجرب الموضوع ومش هتخسر