من أكثر الحاجات الى بتستفزنى فى مجتمعنا المصرى تحديدًا والعربى بشكل عام التدين الشكلى واهتمام الواحد أو الواحدة بلبسها انه يبان انه شرعى وإسلامى ويقفوا عند النقطة دى بس
للأسف بحس ان دى أكبر إساءة للإسلام لأننا بنهمل جوهر الإسلام العبادة والعمل وبيحصل اكتفاء للواحد مجرد انه ربى دقنه وانها لبست حجاب او عباية انها كدا خلاص هتدخل الجنة
بتجنن فعلًا لما اكون عارفة حد كده والاقى حياته الداخلية كلها غير معبرة عن الإسلام بالمرة من الحاجات الى لفتت نظرى مثلًا اهتمام الواحد لما يتجوز او يخطب انه يغير لبس مراته وممكن يلبسها نقاب لكن قد اهتمامه ده مبيسويهوش باهتمام تجاه شخصيتها او تجاه شخصيته حتى فتلاقى عادى انها واحدة متعرفش حاجة فى دينها اصلًا شغالة نميمة وغيبة طول اليوم مراقبة الناس وتقارن أحوالهم بأحوالها وحسد وقرف
ولما تخلف إهمال كامل لأطفالها بجد بقعد افكر هو راضى عن نفسه كدا؟
وازاى بجد وصلنا الحال كلنا اننا منحسش بمسئوليتنا تجاه كل تفاصيل حياتنا؟
ليه ديمًا التعليمات لازم تكون بشكل مباشر بس بعد مرحلة الأمومة الى دخلتها بقيت بشوف كوارث والله فى التعامل مع الأطفال من ناس المفروض انهم بيزعموا التدين يسيبوهم طول اليوم لازقين فى التلفزيون والعيال نظرها تضعف ويجيلهم تخلف من إهمال مهاراتهم والشكوى من الزوج وأهله قدامهم بشكل مستمر حقيقى نفسى افهم ايه المشكلة فينا؟ لسه مبنراعيش ربنا فى كل تفاصيل حياتنا اكيد ده الى ربنا عايزه مننا اكتر من اننا نركز على لبس الناس ونقول معنهدمش دين عشان مش لابسن كذا
